Sesorah saking Kulawarga Calon Penganten Putri ing Adicara Liru Kalpika (Sambutan dari Keluarga Calon Pengantin Putri di Acara Tukar Cincin atau Tunangan)

Assalaamu'alaikum wr.wb.

Ingkang dhahat kinurmatan Bapak Amat Taliroso Sakulawarga
Ingkang kula hormati Para Tamu Undangan
Ingkang kula hormati Para Rawuh Kakung miwah Putri
Ingkang kula tresnani Adik-adik sedaya

Ingkang wiwitan sumangga kita aturaken puji syukur dhumateng Allah SWT ingkang Maha Agung. Awit saking rohmat saha barokahipun ingkang tansah kaparingaken dhumateng kita sedaya, saengga kita saged kempal manunggal ing ndalu menika kanthi raharja tebih ing sambekala. Sholawat saha salam konjuk dhumateng nabi agung Nabi Muhammad SAW. Ingkang tansah dados patuladhan kita ing ndalem gesang. Mugi-mugi mbenjing kita sedaya saged pikantuk syafa'atipun Kanjeng Nabi. Aamiin.

Para lenggah kakung putri ingkang sinuba ing pakurmatan,

Kula minangka sulih salira saking Bapak Taryadi sakulawarga ngaturaken sugeng rawuh dhumateng Bapak Amat Taliroso sak rombongan. Ingkang sampun kersa sowan dhateng mriki. Bapak Taryadi sakulawarga ugi ngaturaken agunging panuwun ingkang tanpa pepindhan dhumateng para rawuh sedaya. Sumangga para rawuh kasuwun lelenggahan kanthi mardikaning penggalih.

Para lenggah kakung putri ingkang sinuba ing pakurmatan,

Saestu Nok Ayu Supriyati dereng wonten ingkang nggadhahi kejawi Nak Bagus Laras Budiarto. Alhamdulillah Nok Ayu Supriyati dipunparingi celak jodhonipun. Inggih mugi-mugi saged dados garwanipun Nak Bagus Laras Budiarto ingkang sae. Sakmenika Bapak Taryadi sakulawarga ngaturaken matur sembah nuwun dhumateng Bapak Amat Taliroso ingkang sampun kersa paring tandha tali asih kagem Nok Ayu Supriyati. Ing pangajab mugi-mugi lekas wekasing sedya saged kasembadan ingkang ami ginayuh. Mugi-mugi ing wekdal ingkang sae Nok Ayu Supriyati kaliyan Nak Bagus Laras Budiarto saged hanglampahi pikrama.

Cekap semanten ingkang saged kula aturaken. Kathahing kalepatan atur, kula nyuwun agunging pangaksami.

Nuwun.

Wassalaamu'alaikum wr.wb.   

Sesorah saking Kulawarga Calon Penganten Kakung ing Adicara Liru Kalpika (Sambutan dari Keluarga Calon pengantin Laki-laki di Acara Tukar Cincin atau Tunangan)

Assalaamu'alaikum wr.wb.

Ingkang dhahat kinurmatan Bapak Taryadi Sakulawarga
Ingkang kula hormati Para Tamu Undangan
Ingkang kula hormati Para kadang, Para Muda lan Adik-adik sedaya

Minangka purwakaning atur, sumangga kita tansah ngaturaken puji syukur wonten ngarsanipun Allah SWT ingkang Maha Agung, ingkang paring berkah ing ndalem gesang, saengga alhamdulillah kita sedaya saged kempal manunggal kanthi raharja tebih ing sambekala. Sholawat saha salam ugi kita aturaken dhumateng nabi agung Nabi Muhammad SAW. Ingkang kita tengga-tengga syafa'atipun mbenjing ing dinten kiyamat. 

Para rawuh ingkang kula hormati,

Sakderengipun kula minangka sulih salira saking Bapak Amat Taliroso sakulawarga ngaturaken matur sembah nuwun dhumateng Bapak Taryadi sakulawarga ingkang sampun paring papan palenggahan saha pasugatan ingkang sae sanget dhumateng kita sedaya. Saha kula ngaturaken matur nuwun ugi dhumateng para rawuh ingkang sampun kersa tindak ing adicara ndalu menika.

Para rawuh ingkang kul hormati,

Kul sak rombongan saking Bapak Amat Taliroso sakulawarga tebih-tebih saking desa Sambong Kebrok sowan dhateng dalemipun Bapak Taryadi sakulawarga saperlu badhe silaturahim. Lajeng ingkang kaping kalih badhe naleni putra pambajengipun Bapak Taryadi ingkang asma Nok Ayu Supriyati. Minangka pratandha miwah tetenger bilih Nok Ayu Supriyati sakmenika sampun wonten ingkang gadhah inggih menika Nak Bagus Laras Budiarto. Sumangga kula suwun Nok Ayu Supriyati madhep kula saperlu nampi tandha liru kalpika saking Nak Bagus Laras Budiarto. Kanthi tandha liru kalpika menika bilih calon penganten kakung saha calon penganten putri kekalihipun tansah asah, asih, asuh, boten kengguh ing godha sakdangunipun nengga wekdal ijab dumugi ingkang insya Allah setaun malih.

Para rawuh ingkang kula hormati,

Menika ingkang saged kula aturaken. Kirang langkungipun kula nyuwun angunging pangaksami.

Nuwun.

Wassalaamu'alaikum wr.wb.     

Sesorah Atur Panampi saking Kulawarga Penganten Putri (Pidato Penerimaan dari Keluarga Pengantin Wanita)

Assalaamu'alaikum wr.wb.

Alhamdulillaahi robbil 'aalamiin. Wabihii nasta'in. Wa'alaa umuuriddunya waddin. Wassholaatu wassalaamu 'alaa asyrofil ambiyaai walmursaliin. Wa'alaa aalihii washohbihii ajma'in. Ammaa ba'du. 

Ingkang dhahat kinurmatan Bapak Ustadz Zaenuddin saha Bapak Amat Taliroso sakulawarga

Ingkang kula hormati Para alim ulama' ingkang wonten ing papan palenggahan menika

Ingkang kula hormati Para rawuh kakung saha putri ingkang bagya mulya

Puji syukur sumangga kita aturaken wonten ngarsanipun Allah SWT. Ingkang Maha Suci lan Maha Welas Asih. Ingkang enjing sonten tansah paring pitedah dhumateng kita sedaya. Supados tindak lampahipun kita wonten ing dalan ingkang haq. Sholawat saha salam konjuk dhumateng Kanjeng Nabi Muhammad SAW. Ingkang dados patuladhan kita sedaya. Mugi-mugi mbenjing saged angsal syafa'atipun Kanjeng Nabi. Aamiin.

Para rawuh ingkang kula hormati,

Kalawau Bapak Ustadz Zaenuddin sampun atur pasrah penganten kakung. Sakmenika kula mengku dhawuh saking Bapak Taryadi sakulawarga badhe atur panampi. Bapak Ustadz Zaenuddin, kanthi bingahing manah kula tampi Nak Bagus Laras Budiarto. Sanajan Nak Bagus Laras Budiarto menika putra mantu, ananging insya Allah Bapak Taryadi sakulawarga nganggep Nak Bagus Laras Budiarto menika kados dene putranipun piyambak. Insya Allah boten badhe mbenten-mbentenaken ing bab menapa kemawon. Bapak Taryadi sakulawarga ugi nyuwun pangapunten dhumateng Bapak Amat Taliroso sakulawarga saking kekiranganipun Nok Ayu Supriyati ing ndalem pikrama. Insya Allah Nok Ayu Supriyati kanthi bingahing manah purun dipunwucal garwanipun, nun inggih Nak Bagus Laras Budiarto.

Para rawuh ingkang kula hormati,
Mekaten ingkang saged kula aturaken. Mugi-mugi penganten kekalih saged gesang guyup rukun, sih kinasih, lan enggal dipunparingi momongan.

Uusiikum wanafsii bitaqwallah.
Nuwun.

Wassalaamu'alaikum wr.wb.    

Sesorah Atur Pasrah Saking Kulawarga Penganten Kakung (Pidato Penyerahan dari Keluarga Pengantin Laki-laki)

Assalaamu'alaikum wr.wb.

Alhamdulillaahi robbil 'aalamiin. Wassholaatu wassalaamu 'alaa asyrofil ambiyaai walmursaliin. Wa'alaa aalihii washohbihii ajma'iin. Ammaa ba'du.

Ingkang dhahat kinurmatan Para alim 'ulama'
Ingkang kula hormati kulawarga saking penganten putri
Ingkang kula hormati Para Bapak saha Ibu sekalian
Ingkang kula tresnani Para Kadang lan Adik-adik sedaya

Langkung rumiyin sumangga kita ngaturaken puji syukur wonten ngarsanipun Allah SWT. Ingkang Maha Kuwasa lan Maha Welas Asih. Ingkang sampun ndamel kita sedaya pepasangan. Saengga saged bagya mulya gesang ing alam donya, alhamdulillah. Sholawat saha salam katur dhumateng Kanjeng Nabi Muhammad SAW. Ingkang sampun paring tuladha ingkang sae sanget ing ndalem pikrama. Kados pundi Panjenenganipun paring welas asih dhumateng garwanipun. Ugi anggenipun ndamel bingah manahipun Siti Khodijah. Mugi-mugi kita sedaya saged nuladha tindak lampahipun Kanjeng Nabi. Lan mugi-mugi mbenjing ing dinten pungkasan kita sedaya saged pikantuk syafa'atipun Kanjeng Nabi Muhammad SAW. Aamiin Allaahumma aamiin. 

Para rawuh ingkang kula hormati,

Sakderengipun kula aturaken sugeng dhaup dhumateng Nak Bagus Laras Budiarto kaliyan Nok Ayu Supriyati. Mugi-mugi wiwit dinten menika ngantos pungkasanipun gesang ing alam donya tnsah linuberan rahmat saha berkah saking Allah SWT. Bapak saha Ibu, kula minangka sesulih saking kulawarga penganten kakung badhe atur pasrah Nak Bagus Laras Budiarto dhumateng kulawarga penganten putri. Bapak Taryadi sekaliyan, menika Bapak Amat Taliroso sakulawarga masrahaken putranipun nun inggih Nak Bagus Laras Budiarto. Nuwun sewu kanthi andhap ashoring manah kersaha Bapak Taryadi sakulawarga nampi Nak Bagus Laras Budiarto. Menawi anggenipun Nak Laras Budiarto sholat jama'ah dhateng masjid utawi musholla kok kendho, nyuwun tulung Bapak Taryadi kersa ngelingaken. Semanten ugi menawi anggenipun paring nafkah lahir saha batin dhateng Nok Ayu Supriyati kok wonten kekiranganipun, nyuwun tulung Nak Laras Budiarto dipunwulang inggih Pak. 

Para rawuh ingkang kula hormati,

Cekap semanten ingkang saged kula aturaken. Matur nuwun kagem sedaya kawigatosanipun. Kupat jangane santen, menawi lepat kula nyuwun pangapunten. 

Uusiikum wanafsii bitaqwallah

Nuwun

Wassalaamu'alaikum wr.wb.   

Sesorah Sambutan Sesepuh Desa ing Adicara Sedhekah Bumi (Pidato Sambutan Orang yang Dituakan di Desa di Acara Sedhekah Bumi)

Assalaamu'alaikum wr.wb.

Ingkang dhahat kinurmatan Para Alim Ulama' Desa Pesaren
Ingkang kula hormati Para Bapak saha Ibu sekalian
Ingkang kula tresnani Adik-adik sedaya

Puji syukur kita aturaken wonten ngarsanipun Allah SWT. Ingkang Maha suci sarta Maha Welas Asih. Ingkang ndamel gesang kita padhang amargi angsal pitedah saking Allah SWT. Sholawat saha salam katur dhumateng Kanjeng Nabi Muhammad SAW. Ingkang sampun nyampurnakaken akhlak para ummatipun. Saengga alhamdulillah kita saged mbentenaken pundi perkawis ingkang sae lan pundi perkawis ingkang awon. Mugi-mugi kita sedaya mbenjing saged angsal syafa'atipun Kanjeng Nabi. Aamiin.

Para rawuh ingkang dipunrahmati Allah

Kalawau siyang Bapak Ketua RT sowan dhateng griya kula. Ngendikanipun supados ndalu menika kula atur sesorah bab sedhekah bumi. Gandheng dipunsuwuni tulung, inggih sampun kula tak matur sak saged-sagedipun kula. Sakderengipun kula matur nuwun sanget dhumateng Para Bapak, ibu lan adik-adik ingkang sampun rekasa mbekta golong damel slametan sedhekah bumi. Mugi-mugi amal sae Panjenengan sedaya dipuntampi Allah SWT. Aamiin.

Para rawuh ingkang dipunrahmati Allah

Kenging menapa kok kita sedaya kedah repot-repot ngawontenaken sedhekah bumi? Pramila ing njawi mrika wonten tiyang ingkang menggalih, sedhekah bumi menika adat jawa kemawon. Haram dipuntindakaken. Sedhekah bumi menika boten wonten paedahipun. Bapak, Ibu, sedhekah bumi menika boten haram, saestu. Malah sae sanget dipuntindakaken. Buminipun dipunsalameti, supados Allah tansah nukhulaken pangan saking bumi. Supados kita sedaya pinaringan kawilujengan nir ing sambikala. Sedhekah bumi menika ugi minangka wujud raos syukur kita dhumateng Allah SWT. Alhamdulillah kita sedaya saged gesang makmur, gemah ripah loh jinawi boten kirang pangan. Para tani asil panen pantunipun sami bagus-bagus. Sanajan buminipun dipunpaculi, dipunidak-idak, dipunturasi, dipunboboti, ananging bumi kanthi ikhlas tetep purun nukulaken pelem, enceh, duren, nangka, semangka, lan sakpanunggalipun kangge para menungsa. 

Para rawuh ingkang dipunrahmati Allah,

Minangka wujud raos syukur kita dhateng Allah SWT, buminipun sumangga kita reksa sareng-sareng. Menawi mbetahaken kayu, anggenipun negor wit sakcekapipun kemawon. Sampun ngantos alasipun dipungundhuli. Mangke ndadosaken bebaya tumrap menungsa piyambak. Menawi alasipun gundhul, ilinipun toya jawah boten kaserep kanthi sampurna lan ndadosaken banjir. 

Cekap semanten ingkang saged kula aturaken. Mugi-mugi kanthi sedhekah bumi menika kita sedaya pinaringan kawilujengan saking Allah SWT, saha saged ngundhakaken raos syukur kita dhumateng Allah SWT. Matur nuwun kagem kawigatosanipun. Kathah kalepatanipun atur, kula nyuwun pangapunten.

Nuwun.

Wassalaamu'alaikum wr.wb.    

Sesorah Sambutan Ketua RW ing ndalem Acara Rapat Rutinan (Pidato Sambutan Ketua RW di Acara Rapat Rutinan)

Assalaamu'alaikum wr.wb.

Alhamdulillaahi robbil 'aalamiin. Robbishrohlii shodrii wayassirlii amrii wahlul uqdatammillisaani yafqohuu qohulii aamiin.

Ingkang kula hormati Para Ketua RT
Ingkang kula hormati Para Bapak lan Para Kadang ingkang rawuh ing rapat rutinan menika

Langkung rumiyin sumangga kita ngaturaken puji syukur wonten ngarsanipun Allah SWT. Ingkang Maha Welas Asih lan Maha Sugih. Ingkang boten eman-eman paring kathah kenikmatan dhumateng kita sedaya. Saengga alhamdulillah ngantos wekdal sakmenika kula lan Panjenengan pinaringan kasugengan. Sholawat saha salam boten kesupen kita aturaken dhumateng Kanjeng Nabi Muhammad SAW. Mugi-mugi mbenjing kita angsal pitulunganipun Kanjeng Nabi ing dinten kiyamat. Aamiin Allahumma aamiin. 

Para rawuh ingkang minulya,

Sekedhap malih wonten pahargyan pitulasan. Ing desa kita badhe ngawontenaken lomba griya sehat. Sakderengipun ngrembag lombanipun, kula kepengin matur bab karesikan. Sejatosipun karesikan menika paedahipun ageng sanget. Dipunwiwiti saking karesikan badan. Mangke mrembet ing karesikan griya. Ingkang wonten gandheng cenengipun kaliyan lomba griya sehat. 

Resik-resik badan menika antawisipun siram ingkang teratur. Saksampunipun wungu enjing, enggal-enggal siram. Badanipun dipunkosok lan dipunsabuni. Rikmanipun dipunkramasi. Lajeng gantos rasukan ingkang resik. Boten susah eman-eman. Sakdangunipun sare, Panjenengan menika kringetan, kelekipun kecut, nuwun sewu inggih medal ileripun. Menawi bakda siram kok rasukan ingkang dipunagem nalika sare dipunagem malih, inggih mambet kecut ingkang nempel ing rasukan boten ical. 

Menawi badanipun sampun resik, kantun manahipun dipunresiki, dipuntata. Upayanipun kados pundi? Saksampunipun siram lajeng wudhu. Sakdangunipun makarya sedinten tansah eling dhumateng Allah SWT. Kanthi dzikir, maos istighfar, maos sholawat, ingkang sae kaliyan Ibu Bapakipun. Menawi manahipun sampun resik, insya Allah dalemipun Panjenengan dipunjamin resik. Lho...kok saged mekaten? Lha inggih, menawi manahipun sampun resik, Panjenengan dados sregep. Panjenengan dados kersa nyapu, ngepel, umbah-umbah, asah-asah. Samangke dalemipun Panjenengan boten kraos dados resik, wangi, lan nyaman dipunpanggeni. Nuwun sewu menawi Panjenengan nyapu, dipun niyati ngresiki manah. Niyat ingsun nyapu, nresiki manah kula, paringana Panjenengan paring ridho. Saengga nyapunipun saged sekeca lan ikhlas. Para Bapak, mangke kondur saking rapat, garwanipun dipuntulari ilmunipun resik-resik inggih Pak.

Para rawuh ingkang minulya,

Wangsul malih dhateng lomba griya sehat. Kangge kegiyatan lomba menika, saben dhusun dipunsuwun supados wonten kalih dalem ingkang dipunlombakaken griya sehat. Lombanipun wiwit tanggal 1 Agustus dumugi 15 Agustus. Samangke saking dewan juri badhe mbiji sakdangunipun kalih minggu menika. Pramila dalem ingkang dipunlombakaken dipun jagi karesikanipun saking tanggal 1 Agustus ngantos 15 Agustus. Sumangga mangke Para Ketua RT dipunrembag, dalemipun sinten ingkang kinten-kinten pantes dipunlombakaken. Ing pangajab mugi-mugi saking dhusun Pesaren saged dados juwara setunggal lomba griya sehat. Kagem Para Bapak Ketua RT, asil saking rembag dalem ingkang badhe dipunderekaken lomba, kula tengga paling dangu tanggal 20 Juli.

Para rawuh ingkang minulya,

Semanten ingkang saged kula aturaken. Kirang langkungipun kula nyuwun agungipun pangapunten.

Nuwun.

Wassalaamu'alaikum wr.wb.

  

Sesorah Sambutan Bupati ing ndalem Upacara Dinten Kartini (Pidato Sambutan Bupati di dalam Upacara Hari Kartini)

Assalamu'alaikum wr.wb.

Ingkang dhahat kinurmatan Para Bapak saha Ibu Camat
Ingkang kula hormati Para Ibu-ibu PKK
Ingkang kula hormati Para Bapak saha Ibu sekalian
Ingkang kula tresnani adik-adik lan sedaya ingkang nderek upacara dinten Kartini

Puji syukur kita aturaken ing ngarsanipun Allah SWT. Ingkang Maha Welas Asih lan Maha 'Alim. Ingkang kersa ilmu dhumateng kita. Saengga saged damel sangu gesang kita ing alam donya. Sholawat saha salam kita aturaken dhumateng Kanjeng Nabi Muhammad SAW. Kanthi sifat fatonah utawi cerdasipun Kanjeng Nabi, alhamdulillah kita saged ngraosaken nikmatipun agama islam. Mugi-mugi mbenjing kita saged dipun anggep ummatipun Kanjeng Nabi. Aamiin.

Para rawuh ingkang kula hormati,
Kula minangka Bupati Batang ngaturaken matur sembah nuwun dhumateng Panjenengan sedaya. Ingkang kersa nglodhangaken wekdalipun kagem tumut upacara dinten Kartini. Ingkang boten saged tumut upacara amargi taksih gerah, mugi-mugi enggal dhangan. Ingkang taksih wonten urusan, mugi-mugi dipunparingi gampil urusanipun.

Para rawuh ingkang kula hormati,

Ing dinten Kartini menika, ngelingaken malih dhumateng kita kaliyan Ibu Kartini. Alhamdulillah saking perjuwangan Panjenenganipun, Para lare estri saged sekolah, gampil anggenipun pados ilmu saengga boten sami bodho. Cobi kula lan Panjenengan awang-awang, kados pundi menawi para lare estri boten sami sekolah? Pramila mbenjing dados ibu, ingkang kedah ndidik putra-putrinipun. Menawi ibunipun bodho, putranipun badhe dipunwucal menapa? Saking menika, sumangga putranipun dipunsekolahaken ingkang temen. Bapak Ibu ngersakaken sekolah ingkang kados pundi? badhe sekolah umum, sekolah islam menapa pondok pesantren? sedayanipun sampun cumawis. Panjenengan kantun milih kemawon. Lajeng menawi kangelan biaya, Panjenengan saged ngajokaken wonten Dinas Pendidikan, utawi saged pados-pados beasiswa. Wonten Bidik Misi, Supersemar, Beasiswa Jarum lan taksih kathah malih. 

Para rawuh ingkang kula hormati,

Kangge mengeti dinten Kartini, saking Kabupaten Batang ngawontenaken lomba-lomba. Wonten lomba masak, cerdas cermat, pidato basa Jawa, macak lan taksih kathah malih. Woro-woronipun saged Panjenengan pirsani wonten ing website Kabupaten Batang utawi ing brosur-brosur, ingkang dipuntempel wonten ing papan pengumuman Pendopo, papan pengumuman Perpustakaan umum Batang, ugi ing sekolah-sekolah.

Para rawuh ingkang kula hormati,

Cekap semanten ingkang saged kula aturaken. Matur nuwun kangge kawigatosanipun. Kula nyuwun pangapunten ingkang kathah menawi wonten atur kula ingkang lepat.

Nuwun.

Wassalaamu'alaikum wr.wb.  

Sesorah Sambutan Pamangku Gati ing ndalem Adicara Halal Bihalal (Pidato Sambutan Shohibul Bait di Acara Halal Bihalal)

Assalaamu'alaikum wr.wb.

Alhamdulillaahi robbil 'aalamiin.

Innalhamdalillahi nahmaduhuu wanasta'iinuhuu wanastaghfiruhuu, wana'uudzubillaahi minsyuruuri anfusinaa waminsayyiaati a'maalinaa, man yahdihillahu falaa mudzillalahu waman yudlil falaa haadiyalah, asyhadu anlaa ilaaha illallah wahdahuu laa syarii kalah, wa asyhadu anna muhammadan 'abduhuu warosuuluh. ammaa ba'du.

Ingkang dhahat kinurmatan Kepala Madrasah Diniyyah Al-Ikhlash

Ingkang kula hormati Para Ustadz saha Ustadzah Madrasah Diniyyah Al-Ikhlash

Ingkang kula hormati Para Tamu Undangan

Ingkang kula tresnani Sedaya Alumni Madrasah Diniyyah Al-Ikhlash

Langkung rumiyin sumangga kita aturaken puji syukur wonten ngarsanipun Allah SWT. Ingkang Maha Pangapunten lan Maha Welas Asih. Mugi-mugi ing dinten riyaya menika sedaya dosa kita dipun ngapunten dening Allah SWT. Mugi-mugi kanthi badan ingkang kasarasan menika kita tansah sregep anggenipun ngibadah lan makarya.

Sholawat saha salam katur dhumateng nabi kita Nabi Muhammad SAW. Ingkang tansah nuladhani kita supados gadhah manah ingkang gampil paring pangapunten. Kados cariyos ingkang nate kula lan Panjenengan mireng, sanadyan Kanjeng nabi dipun ala-ala Panjenenganipun tetep kersa ndulang simbah-simbah ingkang wuta ingkang ngala-ala Kanjeng nabi. Mugi-mugi ing dinten qiyamat kita saged angsal syafa'atipun Kanjeng Nabi Muhammad SAW. Aamiin Allahumma aamiin.

Para rawuh ingkang kula hormati,
Kula minangka pamangku gati ngaturaken sugeng riyadi. Mugiya ing dinten ingkang suci menika kita saged paring pangapunten dhateng sesami. Kula ugi ngaturaken matur sembah nuwun dhumateng para rawuh ingkang sampun kersa tumut adicara halal bihalal ing griya kula. Kejawi saking menika kula ugi nyuwun pangapuntenipun ingkang kathah mbok bilih anggen kula sakulawarga paring pasugatan lan nyumadyakaken papan panggenan kirang sekeca ing penggalihipun Panjenengan sedaya.

Para rawuh ingkang kula hormati,
Kados kasunyatan ingkang wonten alhamdulillah adicara halal bihalal kulawarga ageng Alumni Madrasah Diniyyah Al-Ikhlash sampun saged lumampah kanthi lancar saben taunipun. Mugi-mugi kawontenanipun kas alumni sansaya kathah. Saengga kita saged ngawontenaken kegiyatan sanesipun. Ingkang saged mbekta manfa'at kagem masyarakat kathah. Cekap semanten atur saking kula. Sumangga mangke mauidhoh hasanah saking Bapak Ustadz Hadzik kita mirengaken sareng-sareng. Matur nuwun kagem kawigatosanipun. Nyuwun pangapunten sedaya kalepatanipun atur.

Nuwun.

Wassalaamu'alaikum wr.wb.  



  

Sesorah Sambutan Kepala Desa ing ndalem Adicara Haul (Pidato Sambutan Kepala desa di Acara Haul)

Assalamu'alaikum wr.wb.

Alhamdulillahi robbil 'aalamiin. Wabihii nasta'iin. Wa'alaa umuuriddunyaa waddiin. Wassholaatu wassalaamu 'alaa ashrofil ambiyaaiwal mursaliin. Wa'alaa aalihii washohbihii ajma'iin. Ammaa ba'du.

Ingkang dhahat kinurmatan Rama Kyai Ikhwan
Ingkang kula hormati Para Alim Ulama Desa Pesaren
Ingkang kula hormati Bapak-bapak saha Ibu-ibu sekalian
Ingkang kula welasi adik-adik, Para Muda lan Sedaya Warga Desa Pesaren

Puji syukur kita aturaken dhumateng Allah SWT ingkang Maha Sugih lan Maha Welas asih. Ingkang sampun paring kathah pinten-pinten kenikmatan dhumateng kita sedaya. Saengga ngantos wekdal sakmenika alhamdulillah kita saged kuwarasan lan saged makempal ing papan panggenan menika. Sholawat saha salam katur dhumateng nabi kita Nabi Muhammad SAW. Ingkang sampun ngupayakaken jumenengipun agama islam ing alam donya menika. Mugi-mugi kita saged nuladani tumindakipun Kanjeng nabi.

Para rawuh ingkang kula hormati,

Kula minangka Kepala Desa ngaturaken matur sembah nuwun dhumateng sedaya warga desa Pesaren. Ingkang sampun kersa nderek kegiyatan haul menika. Mugi-mugi amal sae Panjenengan dipun etang ibadah saking Allah SWT. Aamiin ya robbal 'aalamiin. Ing kalodhangan menika kula badhe ngrembag babagan haul ing desa kita. Kegiyatan Haul ingkang sampun lumampah saben taun saestu sampun sae sanget. Ananging menapa inggih ngantos mbenjing badhe mekaten kemawon? Tamtunipun kita kepengin ingkang langkung sae. Salah setunggalipun kanthi nyumadyakaken panggenan ingkang sae kagem dedonga. Mugi-mugi ancang-ancang ndamel aula wonten ing ngajeng makam saged enggal kaleksanan. Samangke wontenipun aula salah setunggalipun kagem kegiyatan haul. Sejatosipun uneg-uneg mbangun aula menika sampun wonten sakderengipun kula dados kepala desa. Lajeng kalawau ingkang dipun aturaken pengurus makam perkawis patok lemah makam, sumangga sesulih saking pengurus makam, rawuh dhateng balai desa kepanggih Bapak Carik. Ing mrika sedaya sampun wonten cathetanipun. 

Para rawuh ingkang kula hormati,

Semanten ingkang saged kula aturaken. Kathah kalepatanipun atur, kula nyuwun agunging pangapunten. 

Nuwun.

Wassalamu'alaikum wr.wb.      

  

   

Sesorah Sambutan Pengurus Makam ing ndalem Adicara Haul (Pidato Sambutan Pengurus Makam di Acara Haul)

Assalamu'alaikum wr.wb.

Alhamdulillahirobbil'aalamiin. Wassholaatu wassalaamu 'alannabiyyil mursaliin. Wa'alaa aalihii washohbihii ajma'in. Amma ba'du.

Ingkang dhahat kinurmatan Rama Kyai Ikhwan
Ingkang dhahat kinurmatan ugi Bapak Kepala Desa Pesaren
Ingkang kula hormati Para Alim Ulama' Desa Pesaren
Ingkang kula hormati Bapak-bapak saha Ibu-ibu sekalian
Ingkang kula tresnani para muda lan Adik-adik sedaya

Ingkang wiwitan sumangga kita ngaturaken puji syukur wonten ngarsanipun Allah SWT. Ingkang taksih paring kalodhangan wekdal dhumateng kita kagem urip ing alam donya. Ugi ingkang tansah paring kasarasan dhumateng kita, saengga ing ndalu menika kula lan panjenengan saged makempal wonten ing adicara haul. 

Sholawat saha salam boten kesupen kita aturaken dhumateng Kanjeng Nabi Muhammad SAW. Ingkang sampun nyampurnakaken agama islam ing donya menika. Mugi-mugi mbenjing kita saged angsal syafa'at saking Kanjeng Nabi. Aamiin  allahumma aamiin.

Para rawuh ingkang kula hormati,

Kula minangka pengurus pesarean ngaturaken matur sembah nuwun dhumateng warga dhukuh Pesaren Krajan, Pesaren Kidul, Pesaren Lor lan Mijen. Ingkang kersa nyengkuyung kegiyatan haul ingkang dipunwontenaken saben taun. Sinaosa boten wonten peraturan tertulis bab haul utawi langkung akrab sinebut nyadran.  

Para rawuh ingkang kula hormati,

Ing kepengurusan makam Desa  Pesaren kula minangka Sekertaris. Dene ketuwanipun Bapak Mudzakir. Lajeng Bendaharanipun Bapak Nur Cahyo. Minangka buka kunci makam Arsa Yudha sakmenika Bapak Dempet. Sejatosipun menawi bendahara cepenganipun arta. Nanging saben kula nyuwun pirsa dhateng Pak Nur Cahyo, angsal pinten yuta Mas? Wangsulanipun setunggal ewu mawon boten wonten. Sumangga saben kemis wage kothak infaqe dipunlebeti arta. Supados wonten pedamelan kagem Bendahara. Lajeng menawi wonten kulawarganipun Panjenengan ingkang seda, urusanipun kaliyan Bapak Dempet.

Para rawuh ingkang kula hormati,

Sumangga mangke sareng-sareng dipunsemak, sejatosipun makna haul menika menapa. Ingkang samangke badhe dipunjlentrehaken dening Rama Kyai Ikhwan. Cekap semanten atur saking kula. Kathahing lepat anggen kula matur, kula nyuwun agunging pangapunten.

Nuwun.

Wassalamu'alaikum wr.wb.

Sesorah Sambutan Ketua Osis ing ndalem Adicara Isra' Mi'raj Nabi Muhammad SAW (Pidato Sambutan Ketua Osis di Acara Isra' Miraj Nabi Muhammad SAW)

Assalamu'alaikum wr.wb.

Ingkang dhahat kinurmatan Bapak Kepala SMK N 1 Batang
Ingkang kula hormati Para Bapak saha Ibu Guru SMK N 1 Batang
Ingkang kula hormati Para Staf Tata Usaha SMK N 1 Batang
Ingkang kula tresnani Para Pengurus OSIS lan Sedaya Siswa SMK N 1 Batang

Ingkang wiwitan sumangga kita ngaturaken puji syukur wonten ngarsanipun Allah SWT. Ingkang Maha welas lan Maha Asih. Ingkang sampun paring nikmat iman, islam, kasarasan, fisik ingkang sampurna dhumateng kita sedaya. Saengga alhamdulillah anggenipun urip ing alam donya menika dipunparingi gampil.

Sholawat saha salam katur dhumateng nabi kita Nabi Muhammad SAW. Mugi-mugi kanthi ngathahi sholawat, kula lan Panjenengan mbenjing saged pikantuk syafa'at saking Kanjeng Nabi Muhammad SAW. Allahumma aamiin. 

Para rawuh ingkang kula hormati,

Kula minangka ketua OSIS ngaturaken matur sembah nuwun dhumateng Bapak Kepala Sekolah. Ingkang sampun paring ijin dhumateng pengurus OSIS kagem ngawontenaken kegiyatan pengaosan Isra' Mi'raj menika. Kula ugi matur nuwun dhumateng Para pengurus OSIS ingkang sampun purun mbiyantu kegiyatan pengaosan menika. Mugi-mugi sedaya amal sae Panjenengan pikantuk piwales ingkang langkung sae saking Allah SWT. Aamiin ya Robbal 'alamiin.

Para rawuh ingkang kula hormati,

Wontenipun pengaosan Isra' Mi'raj ing SMK N 1 Batang, mugi-mugi saged nambah sae ruhani warga SMK N 1 Batang. Mugi-mugi saged nambah sae akhlak para siswa sedaya. Mliginipun mugi-mugi saged ngelingaken dhumateng kita anggenipun ngelampahi jejibahan sholat gangsal wekdal. Menawi para siswa sedaya sampun jangkep anggenipun sholat gangsal wekdal, insya Allah prestasi SMK N 1 Batang saged langkung sae. 

Para rawuh ingkang kula hormati,

Sumangga mauidhoh hasanah saking Rama Kyai Habib Lutfi kula lan Panjenengan mirengaken saha semak. Lan saksampunipun wangsul pengaosan ilmunipun saged kita amalaken. Cekap semanten atur saking kula. Kupat duduhe santen. Menawi lepat kula nyuwun pangapunten.

Nuwun.

Wassalamu'alaikum wr.wb.  

        

Sesorah Sambutan Kepala Madrasah ing Adicara Isro' Mi'raj Nabi Muhammad SAW (Pidato Sambutan Kepala Madrasah di Acara Isro' Mi'roj Nabi Muhammad SAW)

Assalamu'alaikum wr.wb.

Alhamdulillahirobbil'aalamiin. Wassholaatu wassalaamu 'alalmursaliin. Wa'alaa aalihii washohbihii ajma'iin. Ammaa ba'du.

Ingkang kula hormati Para Ustadz lan Ustadzah Madrasah Diniyyah Al-Ikhlash
Ingkang kula hormati Para Alumni Madrasah Diniyyah Al-Ikhlash
Ingkang kula tresnani sedaya santriwan santriwati Madrasah Diniyyah Al-Ikhlash

Langkung rumiyin sumangga kita ngaturaken puji syukur wonten ngarsanipun Allah SWT. Ingkang Maha welas lan Maha Asih, ingkang sampun paring ni'mat iman, islam, kasarasan lan taksih kathah malih dhumateng kita sedaya. Saengga ngantos wekdal sakmenika kula lan Panjenengan dipunparingi gampil anggenipun ngibadah, nyambut damel lan sinau. 

          

Sholawat saha salam sumangga kita aturaken dhumateng Kanjeng Nabi Muhammad SAW. Ingkang sampun nyampurnakaken akhlak sedaya umat ing alam donya menika. Saengga kita sampun boten mrangguli zaman jahiliyah. Mugi-mugi kita sedaya mbenjing saged pikantuk syafa'at saking Kanjeng Nabi Muhammad SAW ing dinten kiyamat. Supados kita boten kepanasan saking srengenge ingkang inggilipun namung setunggal kilan saking mustakanipun menungsa.  

Para rawuh ingkang kula hormati, 

Sakderengipun kula ngaturaken matur nuwun dhumateng para alumni ingkang sampun purun nglodhangaken wekdalipun kagem dumugi ing pengaosan isra' Mi'raj menika. Kula minangka Kepala Madrasah Diniyyah Al-Ikhlash ugi ngaturaken matur nuwun dhumateng sedaya pihak ingkang sampun mbiyantu kegiyatan Pengaosan Isra' Mi'raj. Jazakumullah khoirul jazah.

           

Para rawuh ingkang kula hormati,
Kenging menapa ing madrasah ngawontenaken Pengaosan Isra' Mi'raj? Inggih menika kangge mengeti lelampahanipun kanjeng nabi Muhammad SAW nalika nindakaken Isra' Mi'raj. Nalika semanten kanjeng nabi nindakaken lelampahan saking Masjidil Haram ingkang wonten ing Makkah dumugi Masjidil Aqsa ingkang wonten ing Yerussalim. Ing wekdal ingkang sami, inggih menika setunggal ndalu, kanjeng nabi ugi nindakaken lelampahan saking bumi tumeka langit sap pitu, dipunlajengaken dhateng Sidratul Muntaha. Wondene oleh-oleh saking Isra' Mi'raj inggih menika pikantuk dhawuh saking Allah SWT supados kanjeng nabi sak umatipun nindakaken sholat gangsal wekdal. Inggih menika isya', shubuh, dhuhur, ashar lan maghrib. Pramila sumangga adik-adik ingkang sholatipun dereng jangkep gangsal wekdal, dipunjangkepi. Amargi sholat menika hukumipun wajib kagem tiyang muslim. Menawi boten ngelampahi sholat, angsal dosa. Menawi gadhah dosa mbenjing menawi sampun pejah angsal siksa saking Allah SWT.

            

Para rawuh ingkang kula hormati,

Mekaten ingkang saged kula aturaken. Kula nyuwun pangapunten ingkang kathah, menawi sakdangunipun matur kathah kalepatan. 

Nuwun.

Wallahul muwaffiq ila aqwamit thariq 

Wassalamu'alaikum wr.wb.

            

Sesorah Sambutan Ketua Panitia ing Adicara Pengaosan Isra' Mi'raj (Pidato Sambutan Ketua Panitia di Acara Pengajian Isra' Mi'raj)

Assalamu'alaikum wr.wb.

Ingkang dhahat kinurmatan Bapak Kyai Akrom Sofwan saking Pekalongan
Ingkang dhahat kinurmatan ugi Bapak Kepala Desa Pesaren
Ingkang kula hormati Para Alim Ulama' Desa Pesaren
Ingkang kula hormati Para Tamu Undangan
Ingkang kula hormati Para Bapak saha Ibu lan Sedaya ingkang rawuh ing Pengaosan menika

         
Bapak saha Ibu ingkang kula hormati,  
Langkung rumiyin sumangga kita ngaturaken puji syukur wonten ngarsanipun Allah SWT ingkang Maha welas lan Maha asih. Ingkang sampun paring kasarasan dhumateng kita sedaya lan ingkang sampun paring kathah rejeki dhumateng kita sedaya saengga kula lan Panjenengan dipunparingi gampil urip ing alam donya menika.

Sholawat saha salam konjuk dhumateng nabi kita  Nabi Muhammad SAW ingkang sampun ngasta kita saking zaman onta dumugi zaman toyota. Ingkang sampun ngasta kita saking zaman jahiliyah dumugi zaman islamiyyah. Mugi-mugi kita sedaya mbenjing kiyamah saged pikantuk syafa'at saking Kanjeng Nabi. Aamiin ya robbal 'aalamiin.
           
Bapak saha Ibu ingkang kula hormati,
Kula minangka ketua panitia ngaturaken matur sembah nuwun dhumateng sedaya warga Desa Pesaren ingkang sampun mbiyantu biaya kagem pengaosan isra' mi'raj menika. Mugi-mugi amal sae Panjenengan sedaya angsal piwales ingkang langkung sae saking Allah SWT. Wondene kalawingi urunan saking para warga Desa Pesaren pikantuk pitung yuta gangsal atus seket ewu rupiah. Sedaya arta menika boten namung saking dhusun Pesaren kemawon. Ananging ugi saking dhusun Mijen, Sudan, Kebaran, Kasapan lan Badulan. Matur nuwun sanget inggih Bapak lan Ibu sedaya. Pengaosan Isra' Mi'raj menika minangka kegiyatan kaping kalih ingkang dipunwontenaken lare-lare karang taruna Desa Pesaren. Kula sesulih saking karang taruna nyuwun pangapunten menawi kathah kekirangan ing ndalem pengaosan Isra' Mi'raj menika. Insya Allah ing ngajengipun kula sakanca karang taruna purun sinau terus supados saged langkung sae menawi ngawontenaken kegiyatan malih.
       
Bapak saha Ibu ingkang kula hormati,
Semanten rumiyin ingkang saged kula aturaken. Kupat jangane santen, menawi lepat kula nyuwun pangapunten.
Nuwun.

Wassalamu'alaikum wr.wb.

Sesorah Sambutan Kepala Desa Ing Adicara Isra' Mi'raj Nabi Muhammad SAW (Pidato Sambutan Kepala Desa di Acara Isra' Mi'raj Nabi Muhammad SAW)

Assalamu'alaikum wr.wb.

Ingkang dhahat kinurmatan Bapak Kyai Akrom Sofwan
Ingkang kula hormati Para Alim Ulama Desa Pesaren
Ingkang kula hormati Para Tamu Undangan
Ingkang kula hormati Para Bapak saha Ibu lan sedaya ingkang rawuh wonten ing majelis menika

Sumangga kita ngaturaken puji syukur wonten ngarsanipun Allah SWT. Ingkang sampun paring kathah kenikmatan dhumateng kita sedaya. Saengga wonten adicara menika kula lan panjenengan saged makempal kanthi bungahing manah boten wonten alangan setunggal menapa. 

Sholawat saha salam sumangga kita aturaken dhumateng nabi kita Nabi Muhammad SAW. Ingkang sampun ngrembakakaken agama Islam ing alam donya menika. Ugi ingkang kula lan Panjenengan derekaken syafa'atipun mbenjing ing dinten kiyamat.

               
Para rawuh ingkang kula hormati,

Kula minangka Kepala Desa Pesaren ngaturaken matur nuwun dhumateng panitia Karang Taruna "Mandiri" ingkang sampun purun ngawontenaken pengaosan Isra' Mi'raj wonten ing desa kita. Kegiyatan menika saestu sae sanget lan wujud kegiyatan ingkang positif. Mugi-mugi ngajengipun saged ngawontenaken kegiyatan ingkang sae malih. Insya Allah saking desa siyap mbiyantu. 

               
Para rawuh ingkang kula hormati,

Pengaosan Isra' Mi'raj menika kagem mengeti lelampahanipun kanjeng Nabi Muhammad SAW nalika pikantuk dhawuh saking Gusti Allah supados ngelampahi sholat 5 wekdal. Lha mugi-mugi wontenipun pengaosan menika saged ngelingaken kula lan panjenengan supados boten nilaraken sholat 5 wekdal. Saengga insya Allah saged ndadosaken tentremipun manah kula lan panjenengan. Sumangga ingkang wingi-wingi sholatipun taksih bolong-bolong, dipunjangkepi. Sumangga ingkang wingi-wingi Masjid Jami' Desa Pesaren nalika shubuh lan isya' sekedhik ingkang nderek sholat jama'ah, dipunkebaki. Jama'ah wonten masjid menapa mushola menika boten namung jejibahanipun ingkang sepuh kemawon. Adik-adik karang taruna Desa Pesaren inggih kedah sregep jama'ah wonten masjid utawi mushola.
               
Para rawuh ingkang kula hormati,
Alhamdulillah karang taruna Desa Pesaren sampun jalan malih. Sumangga kula lan Panjenengan sengkuyung sareng-sareng. Menawi wingi-wingi aturipun adik-adik karang taruna mbetahaken Base Camp, sumangga saged manggen wonten balai desa. Ing mrika wonten setunggal ruwang kosong. Sumangga saged dipunginakaken kagem karang taruna. Ingkang wigati ruwanganipun dipunreksa.
             
Para rawuh ingkang kula hormati,
Semanten ingkang saged kula aturaken. Kula nyuwun pangapunten menawi wonten kathah kalepatan anggen kula matur.
Nuwun.

Wassalamu'alaikum wr.wb.  

Sesorah Memetri Basa Jawi ing Kulawarga (Pidato Melestarikan Bahasa Jawa di dalam Keluarga )

Assalamu'alaikum wr.wb.

Ingkang dhahat kinurmatan Bapak Gubernur Jawa Tengah
Ingkang kula hormati Bapak Walikota Semarang
Ingkang kula hormati Kepala Balai Bahasa Jawa Tengah
Ingkang kula hormati Para tamu undangan
Ingkang kula hormati Bapak saha Ibu Dewan Juri
Ingkang kula hormati Para rawuh kakung miwah putri
Boten kesupen ugi ingkang kinurmatan Para peserta lomba pidato basa Jawi

           Ingkang wiwitan, sumangga kita ngaturaken puji syukur wonten ngarsanipun Gusti Allah ingkang Maha Welas lan Maha Asih. Alhamdulillah ngantos wekdal sakmenika kula lan panjenengan sedaya dipun paringi sehat saengga saged ngrawuhi adicara ing siyang menika kanthi boten wonten alangan setunggal menapa.

Sholawat saha salam sumangga kita aturaken dhumateng Nabi kita Muhammad SAW. Ingkang dados patuladan kita sedaya lan ingkang kita tengga-tengga syafa'atipun mbenjing ing dinten akhir.

               Bapak saha Ibu ingkang kula hormati,

Sakderengipun kula badhe ngaturaken matur sembah nuwun ingkang tanpa pepindan dhumateng para panitia lomba. Ingkang sampun kersa nglodhangaken wekdalipun kagem ngawontenaken lomba pidato basa Jawi. Kula ugi badhe ngaturaken matur sembah nuwun dhumateng Bapak Gubernur Jawa Tengah ingkang sampun kersa nguri-uri basa Jawi ing tengah zaman ingkang sampun globalisasi menika. 

               Bapak saha Ibu ingkang kula hormati,

Kula minangka peserta lomba pidato basa Jawi, wonten ing kalodhangan menika badhe matur bab "memetri basa jawi ing ndalem kulawarga". Memetri utawi ngopeni basa Jawi ing ndalem kulawarga menika tumindak ingkang boten gampil dipunlampahi. Boten kathah para lare ingkang purun migunakaken basa krama nalika matur kaliyan ibu lan bapakipun. Menapa malih para lare sampun kulina migunakaken basa ngoko nalika matur kaliyan ibu lan bapakipun, lajeng kedah gantos migunakaken basa krama. Menika perkawis ingkang boten gampil. 

                Bapak saha Ibu ingkang kula hormati,

Kados pundi penggalih panjenengan nalika para putranipun panjenengan nalika matur kaliyan panjenengan migunakaken basa ngoko? Panjenengan trenyuh manahipun boten? Kula kinten trenyuh manahipun. Sakwangsulipun kados pundi penggalih panjenengan nalika para putranipun panjenengan nalika matur kaliyan panjenengan migunakaken basa krama? Panjenengan remen boten? Insya Allah remen manahipun. Lajeng kados pundi supados putranipun Panjenengan saged matur basa krama? Menika kedah wonten upaya-upaya ingkang dipunlampahi. Upaya ingkang kados pundi? Inggih boten susah angel-angel. Nalika  guneman kaliyan garwanipun panjenengan, menika dipun upayakaken migunakaken basa krama. Semanten ugi nalika ngendika kaliyan putranipun. Menika migunakaken basa krama, kanthi niyatan nyinaoni putranipun supados saged matur migunakaken basa krama. Ingkang wigati menika paring patuladhan dhumateng putranipun. Pramila nalika panjenengan guneman utawi mangsuli pitakenipun Ibu Bapak Panjenengan menika migunakaken basa krama. Saengga putranipun panjenengan saged ningali, bilih Ibu lan Bapak nalika matur kaliyan Mbah Putri lan Mbah kakung migunakaken basa krama. Kanthi mekaten putranipun panjenengan saged nuladani. Ing pungkasanipun insya Allah kula lan panjenengan saged memetri utawi ngopeni basa Jawi ing ndalem kulawarga kula lan panjenengan.

                Bapak saha Ibu ingkang kula hormati,

Cekap semanten ingkang saged kula aturaken. Kula nyuwun agunging pangaksami menawi kathah kalepatan sakdangunipun kula matur wiwit kalawau. 

Nuwun.

Wassalamu'alaikum wr.wb.        

              

Sesorah Selapanan Bayi

Assalamu'alaikum Wr.Wb.

Para Sesepuh ingkang dhahat kinurmatan
Para Bapak saha sanak kadang ingkang kula hormati

Purwakaning atur, sumangga kita sami ngonjukaken puji syukur dhumateng ngarsanipun Allah SWT. Ingkang sampun paring kasarasan dhumateng kita sedaya. Saengga  kita saged makempal  wonten ing papan palenggahan menika.

 Para Bapak ingkang kula hormati

Kula minangka pamangku gati, ngaturaken matur sembah nuwun kagem rawuhipun panjenengan sedaya.  Ing adicara selapanan menika kula sakulawarga nyuwun donga pangestunipun para rawuh. Kagem kelairanipun putra pambajeng kula pun bagus Muhammad Romadhon. Mugi-mugi putra kula saged dados lare ingkang sholeh, ngabekti dhumateng tiyang sepuhipun saha anggadhahi akhlak ingkang sae.  Adicara selapanan menika minangka wujud raos syukur kula sakulawarga wonten ngarsanipun Allah SWT. Ingkang sampun paring dhumateng kula  putra ingkang bagus, sampurna boten kirang setunggal menapa.

 Para Bapak ingkang kula hormati

Kados mekaten ingkang saged kula aturaken. Saklajengipun para rawuh kula suwun lenggah rumiyin ngantos paripurnaning adicara.

Pungkasaning atur, kula minangka pamangku gati nyuwun agunging pangaksami awit kathahing kekirangan anggenipun nampi para rawuh sedaya.

Nuwun.

Wassalamu'alaikum Wr.Wb. 

Katrangan:
Tegese Tembung:
1. Selapanan : duwe gawe nalika bayi umur telung puluh lima dina.
2. Purwakaning atur : Pembukane ngomong
3. Pamangku gati : Sing duwe gawe
4. Paripurnaning adicara : Rampunge acara
5. Nyuwun agunging pangaksami: Nyuwun ngapura sing akeh
6. Putra pambajeng : Anak mbarep, anak pertama
7. Pungkasaning atur : akhir kata



 

MC Maulid Nabi Muhammad SAW(Panatacara Muludan)

Assalaamu'alaikum Warohmatullaahi Wabarokaatuh
Alhamdulillahi robbil'aalamiin. Wassholaatu wassalaamu 'alaa asyrofil mursaliin. Wa'alaa aalihii washohbihii ajma'iin. Ammaa ba'du.

Ingkang kula hormati Bapak Kepala Desa Pesaren
Ingkang dhahat kinurmatan Rama Habib Abbas bin Abu Bakar Al Hadad
Ingkang kula hormati Para Alim ulama' Desa Pesaren
Para Bapak saha Ibu ingkang kula hormati
Saha para hadirin sedaya ingkang minulya.

Para hadirin ingkang kula  mulyakaken

Wonten ing wekdal ingkang sae menika, lan wonten ing papan panggenan ingkang barokah, keparenga kula minangka panatacara badhe maosaken reroncenipun adicara wonten ing ndalu menika.

Acara kaping setunggal pambuka

Acara kaping kalih inggih menika waosan ayat suci al qur'an

Acara kaping tiga waosan maulid simtudduror

Adicara kaping sekawan mauidhoh hasanah

Acara kaping gangsal do'a lan penutup

Minangka wiwitan, sumangga kita bikak acara menika kanthi waosan basmalah. Bismillaahir rohmaanir rohiim.

Mlebet acara kaping kalih inggih menika waosan ayat suci al qur'an. Ingkang sakmenika badhe dipun aturaken dening Bapak Munawar. Katur dhumateng Bapak Munawar kula sumanggakaken.

Acara saklajengipun waosan maulid simtudduror.

Wondene, adicara ingkang kita tengga-tengga nun inggih mauidhoh hasanah.  Ingkang sakmenika badhe dipun aturaken dening Rama Habib Abbas bin Abu Bakar Al Hadad. Katur dhumateng Rama Habib Abbas bin Abu Bakar Al Hadad kula sumanggakaken. Sholluu 'alannabii Muhammad.

Acara ingkang pungkasan inggih menika do'a. Ingkang badhe dipun aturaken dening Bapak Ustadz Hadzik H. Tasli. Katur dhumateng Bapak Ustadz Hadzik H. Tasli, kula sumanggakaken.

Kados mekaten acara muludan ing ndalu menika. Kula minangka panatacara, nyuwun agunging pangapunten, awit sekathahing kalepatan anggen kula matur.

Wassalaamu 'alaikum warohmatullaahi wabarokaatuh.